வைத்தியர் ஷாபிக்கு பிரமுகர்கள் பாராட்டு; இனவாதிகளுக்கு சிறந்த பதிலடி கொடுத்துள்ளதாக சுட்டிக்காட்டு

admin@vidiyal.lk Jun 16, 2022 924 0

தனக்கு கிடைக்கப் பெற்றுள்ள சம்பளப் பணத்தினை, தற்போது நாட்டில் நிலவும் மருந்துப் பற்றாக்குறையை கருத்திற் கொண்டு வைத்தியசாலைகளுக்கு மருந்துப் பொருட்களை கொள்வனவு செய்து வழங்க தீர்மானித்து வைத்தியர் ஷாபிக்கு பிரமுகர்கள் பலரும் பாராட்டுத் தெரிவித்துள்ளனர்.

அத்துடன் இந்த செயல் மூலம் அவர் இனவாதிகளுக்கு தக்க பதிலடி கொடுத்துள்ளதாகவும் சுட்டிக்காட்டியுள்ளனர். இது தொடர்பில் கருத்து வெளியிட்டுள்ள முன்னாள் ஜனாதிபதி சந்திரிகா பண்டாரநாயக்க குமாரதுங்க,

"பொய், பொறாமை மற்றும் வெறுப்பு ஆகியவற்றை அணிகலனாகக் கொண்டிருந்த சிங்கள தீவிரவாதத்தின் வெட்கக்கேடான அத்தியாயம், ஒரு நல்ல தொழில்சார் நிபுணரின் வாழ்க்கையை சீரழித்துவிட்டது. அவர்கள் உங்கள் மீது உமிழ்ந்த வெறுப்புக்கு நீங்கள் வழங்கியுள்ள பதிலுக்கு வாழ்த்துகள். நேர்மையாக சிந்திக்கும் சிங்கள குடிமக்கள் எப்போதும் உங்களோடு இருக்கிறார்கள்" எனத் தெரிவித்துள்ளார்.

குருநாகல் வைத்தியசாலையில் கடமையாற்றிய சமயம், சிங்கள பெண்களுக்கு சட்டவிரோதமாக கருத்தடை செய்ததாக பொய்யாக குற்றஞ்சாட்டப்பட்டு பதவியிலிருந்தும் இடைநிறுத்தப்பட்ட டாக்டர் ஷாபியின் சம்பளப் பாக்கியை வழங்குமாறு அண்மையில் நீதிமன்றம் உத்தரவிட்டிருந்தது. இதற்கமைய தற்போது அவருக்கு சுகாதார அமைச்சு சம்பளப் பணத்தை வழங்கியுள்ளது.

இது தொடர்பில் டாக்டர் ஷாபிக்கு வாழ்த்துத் தெரிவித்து வெளியிட்டுள்ள டுவிட்டர் பதிவிலேயே முன்னாள் ஜனாதிபதி சந்திரிக்கா இவ்வாறு சுட்டிக்காட்டியுள்ளார். அதேபோன்று எதிர்க்கட்சித் தலைவர் சஜித் பிரேமதாசவும் தனது டுவிட்டரில் கருத்து வெளியிட்டுள்ளார்.

“மதத் தீவிரவாதத்திற்குப் பின்னால் பொறாமையும் குறுகிய மனப்பான்மையும் இருக்கிறதே தவிர எந்த மதமும் இல்லை என்பதற்கு டாக்டர் ஷாபியின் வழக்கு ஒரு சிறந்த உதாரணம். இனவாதிகளுக்கு அவர் பதிலளித்துள்ள விதம் உண்மையிலேயே எம்மை ஈர்த்துள்ளது" என அவர் குறிப்பிட்டுள்ளார்.

இதனிடையே தேர்தல்கள் ஆணைக்குழுவின் முன்னாள் தலைவர் மஹிந்த தேசப்பிரியவும் இது தொடர்பில் கருத்து வெளியிட்டுள்ளார்.

"வைத்தியர் ஷாபி சிஹாப்தீனுக்கு எனது பாராட்டுக்கள். அவமானம் என்பது அவருக்கு எதிரான பொய்களை சமூகமயமாக்கிய அனைவருக்கும், அதை நம்பி அமைதியாக இருந்த அனைவருக்கும் சொந்தமானது” என அவர் தனது முகநூல் பதிவில் குறிப்பிட்டுள்ளார்.

இதேபோன்று மேலும் பல அரசியல் மற்றும் சிவில் சமூக செயற்பாட்டாளர்களும் டாக்டர் ஷாபிக்கு எதிரான இனவாதக் கருத்துக்களைக் கண்டித்துள்ளதுடன் அவர் மீது பொய்க்குற்றச்சாட்டுக்களைச் சுமத்தியவர்களுக்கு எதிராக சட்ட நடவடிக்கை எடுக்கப்பட வேண்டும் என வலியுறுத்தியுள்ளமை குறிப்பிடத்தக்கது.

Vidivelli