உயிர்த்த ஞாயிறு தாக்குதலுக்கு பொறுப்பானவர்களை சட்டத்தின் முன் நிறுத்துவேன்: ஜனாதிபதி

உயிர்த்த ஞாயிறு அன்று இடம்பெற்ற தற்கொலைத் தாக்குதல்களினால் 270 பேர் உயிரிழந்தனர். சுமார் 500 பேர் காயமுற்றனர். காயமடைந்தவர்களில் சிலர் பின்னர் உயிரிழந்தனர். இன்னும் சிலர் நிரந்தர உடற் பாதிப்பிற்கும் உள்ளாகினர்.

தாக்குதலில் உயிரிழந்த பெரும்பாலானவர்கள் கத்தோலிக்க சமயத்தவர்கள் என்ற போதும் அது அவர்களை மட்டுமன்றி முழு இலங்கை மக்களையும் இலக்கு வைத்த பயங்கரவாத நடவடிக்கையாகும்.

எந்தச் சிந்தனையின் பெயரில் இந்த மனிதப் படுகொலை செய்யப்பட்டிருந்தாலும், இது மனித இனத்திற்கே இழுக்கான ஒன்றாகும். தேசிய பாதுகாப்பை மறந்து, பாதுகாப்பு திட்டங்களும் ஏற்பாடுகளும் கைவிடப்பட்டிருந்த காரணத்தினாலேயே உயிர்த்த ஞாயிறு மனிதப் படுகொலைக்கு உகந்ததான பின்னணி உருவானது.

அத்தகையதொரு கட்டற்ற சூழலில் தீவிரவாதமும் பயங்கரவாதமும் தலைதூக்குவது ஆச்சரியமான ஒன்றல்ல. 'சுபீட்சத்தின் நோக்கு' என்ற எனது கொள்கைப் பிரகடனத்தில் நான் உறுதியளித்தவாறு எனது ஆட்சிக் காலத்தில் அனைத்து இன மக்களினதும் பாதுகாப்பை உறுதிப்படுத்துவதற்கும், எந்த வகையிலும் தீவிரவாதத்திற்கும், தீவிரவாத வன்முறைக்கும் இடமளிக்காது இருப்பதற்கும், உயிர்த்த ஞாயிறு தாக்குதலுக்குப் பொறுப்புக் கூறவேண்டியவர்களை சரியாக இனம்கண்டு சட்டத்தின் முன் நிறுத்துவதற்கும் உரிய அனைத்தையும் செய்வேன் என நான் எனது மக்களுக்கு உறுதியளிக்கின்றேன்.

உயிர்த்த ஞாயிறு தாக்குதலில் பலியான, பாதிப்புக்கு உள்ளான கத்தோலிக்க மக்கள் உள்ளிட்ட இலங்கை மக்களுக்கு நான் மீண்டும் எனது ஆத்மார்த்த அனுதாபங்களைத் தெரிவித்துக்கொள்கின்றேன்.