குடும்ப சுகாதார பணியகம் வெளியிட்ட அறிவிப்பு என பரவும் செய்தி தவறானது!

"பயணக் கட்டுப்பாடுகளின் போது தேவையற்ற கர்ப்பத்தைத் தவிர்க்கவும்" என்று இலங்கை குடும்ப சுகாதார பணியகம் ஓர் அறிவிப்பை வெளியிட்டுள்ளதாக பேஸ்புக் உட்பட சமூக ஊடகங்களில் பல செய்திகள் பரப்பப்படுகின்றன.

இலங்கையர்களிடம் கர்ப்பமாகுவதனை தவிர்க்குமாறு இலங்கை குடும்ப சுகாதார பணியகம் கோரிக்கை

இது தொடர்பான உண்மைத் தன்மையினை அறியும் நோக்கில் தேடுதல் நடவடிக்கையொன்றினை நாம் முன்னெடுத்த போது பின்வரும் தகவல்கள் தெரியவந்தன.

அதாவது, 02.06.2021 அன்று சுகாதார மேம்பாட்டு பணியகம் (HPB) நடத்திய ஊடக சந்திப்பின் போது பரிமாறப்பட்ட இந்த செய்தியின் நம்பகத்தன்மை குறித்து மேற்கொண்ட ஆய்வில், இச்செய்தி குறித்த உண்மைகளை கண்டுபிடிக்க முடிந்தது.

"பொது மருத்துவ நடைமுறைக்கான தொடர் வழிகாட்டுதல்களின் கீழ் அறிக்கையிடப்பட்ட தேவையற்ற கர்ப்ப முறைகளின் விழிப்புணர்வு மற்றும் மறுபரிசீலனைக்கு பொதுவான காரணம் உள்ளதா, இந்த தொற்றுநோய்களிலும் கூட இதைத் தொடரலாமா?" என ஊடகவியலாளர் சந்திப்பின் போது ஒரு ஊடகவியலாளர் கேள்வி எழுப்பியிருந்தார்.

குறித்த கேள்விக்கு இலங்கை குடும்ப சுகாதார பணியகத்தின் பணிப்பாளர் வைத்தியர் சித்ரமாலி டி சில்வா பின்வருமாறு பதிலளித்திருந்தார்.

"பயணக் கட்டுப்பாடுகளின் போது கூட தேவையற்ற கர்ப்பத்தைத் தவிர்ப்பது முக்கியம், மேலும் பெற்றோர்கள் தங்கள் சொந்த குடும்பத்தில் புத்திசாலித்தனமான முடிவுகளை எடுக்க வேண்டும்.

குடும்பக் கட்டுப்பாட்டு முறையைப் பயன்படுத்தும் தம்பதிகளுக்கு பொதுவாக ஆலோசனை சேவைகள் வழங்கப்படுகின்றன, சில சமயங்களில் சுகாதார ஊழியர்கள் வீடுகளுக்கு அல்லது குடும்பக் கட்டுப்பாடு கிளினிக்குகள் மூலம் வருகிறார்கள்.

கடந்த ஆண்டு கோவிட் -19 தொற்றுநோய் தொற்று ஏற்பட்டதில் இருந்து குடும்பக் கட்டுப்பாடு சேவைகள் நிறுத்தப்படவில்லை, மேலும் சேவைகள் எந்தவிதமான தடங்களும் இன்றி தொடரும். இந்த சேவை எந்தவொரு சந்தர்ப்பத்திலும் சிதைந்தால், அது குடும்பத்தின் பாதுகாப்பு மற்றும் நல்வாழ்வுக்கு சில சிக்கல்களை ஏற்படுத்தக்கூடும்.

எனவே, இந்த காலகட்டத்தில் தேவையற்ற கர்ப்பத்தைத் தடுப்பதில் குடும்ப சுகாதார சேவைகள் மற்றும் குடும்ப சுகாதார பணியகம் தொடர்ந்து செயல்படும். இது சம்பந்தமாக ஏதேனும் சிக்கல் இருந்தால், தேவையான சேவையைப் பெற நீங்கள் குடும்ப சுகாதார மருத்துவ அதிகாரி, சுகாதார மருத்துவ அதிகாரி அல்லது உங்கள் பகுதியில் அருகிலுள்ள மருத்துவமனைக்குச் செல்லலாம்” என்றார்.

குடும்ப சுகாதார பணியகத்தின் பணிப்பாளர் வெளியிட்ட மேற்படி கருத்தினையே "பயணக் கட்டுப்பாடுகளின் போது தேவையற்ற கர்ப்பத்தைத் தவிர்க்குமாறு குடும்ப சுகாதார பணியகம் பொதுமக்களிடம் கோருகிறது" என்ற தவறான ஒரு செய்தி சமூக ஊடகங்களில் பகிரப்படுகின்றது.

இந்த செய்தியின் உண்மைத்தன்மை பற்றி மேலும் அறிய குடும்ப சுகாதார பணியகத்தின் பணிப்பாளர் வைத்தியர் சித்ரமாலி டி சில்வாவினை தொடர்புகொண்டு வினவிய போது,

"தேவையற்ற கர்ப்பங்களை கட்டுப்படுத்தும் நோக்கில் பயணக் கட்டுப்பாடுகள் இருந்த போதிலும், குடும்ப ஆலோசனை சேவை தொடர்ந்து செயல்பட்டு வருகின்றது என்று தெரிவித்த விடயம் 'பயணக் கட்டுப்பாடுகள் விதிக்கப்படும் காலகட்டத்தில் தேவையற்ற கர்ப்பத்தைத் தடுக்குமாறு குடும்ப சுகாதார பணியகம் பொதுமக்களை வலியுறுத்துகிறது' என தவறான முறையில் பகிரப்படுகிறது" என்றார்.

எனவே, இது போன்ற தவறான தகவல்களை சமூக ஊடகங்களில் பகிர்ந்து மக்களை பிழையான வழிநடத்துவதை நாம் அனைவரும் தவிர்த்துக்கொள்வோம்.